ព្រះសីហនុ៖ មនុស្សម្នាក់បានស្លាប់ និង ៨នាក់ទៀតរងរបួសធ្ងន់និងស្រាល ក្នុងហេតុការណ៍គ្រោះថ្នាក់ចរាចរណ៍រវាងរថយន្ត ២គ្រឿងបុកគ្នានៅវេលាម៉ោងជាង ៤ល្ងាច ថ្ងៃទី១៥ ខែមករា ឆ្នាំ២០២៣ លើផ្លូវជាតិលេខ៤ ចន្លោះបង្គោលគីឡូម៉ែត្រលេខ២១៤-២១៥ ស្ថិតនៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ។

របាយការណ៍ពីសមត្ថកិច្ចបញ្ជាក់ថា គ្រោះថ្នាក់ចរាចរណ៍នេះកើតឡើង រវាងភាគីរថយន្តឡង់គ្រីស័រ ពណ៌ស ពាក់ស្លាកលេខ ព្រះសីហនុ ២F-៨៩៨៩ ទិសដៅពីភ្នំពេញ-ព្រះសីហនុ អ្នកបើកបរឈ្មោះ YUAN HONGFEI ភេទប្រុស អាយុ ៣៤ឆ្នាំ ជនជាតិចិន មានអ្នករួមដំណើរ ២នាក់ទៀត ក្នុងនោះម្នាក់ប្រុសរងរបួសស្រាលនិងម្នាក់ទៀតស្រីរងរបួសធ្ងន់ (មិនទាន់ស្គាល់អត្តសញ្ញាណ )។

ភាគីម្ខាងទៀត រថយន្តតូរីស ពណ៌ ស ពាក់ស្លាកលេខ ភ្នំពេញ 2AM-២៥០៨ ទិសដៅបញ្ច្រាស់គ្នា អ្នកបើកបរឈ្មោះ តូច សំអុល ភេទប្រុស ទីលំនៅ ខេត្តតាកែវ បណ្តាលឲ្យ អ្នកបើកបររថយន្តតូរីស ឈ្មោះ តូច សំអុល ស្លាប់នៅកន្លែងកើតហេតុ។

ចំណែកអ្នកជិះក្នុងរថយន្តតូរីសនេះ៦នាក់ទៀត មានប្រុស មានស្រី រងរបួសធ្ងន់និងស្រាល។ បច្ចុប្បន្ន ករណីនេះនគរបាលជំនាញនិងដោះស្រាយបន្តតាមនិតិវិធី៕